Sembalhátíð í Vallanesi

Sembalhátíð var haldin í Vallaneskirkju dagana 6. - 10. mars. Hátíðin samanstóð af þrennum tónleikum, föstudaginn 6. mars flutti hópur tónlistarmanna sem flestir eru ættaðir eða búsettir á Austurlandi barrokktónlist (eða nokkurn vegin frá barrokk tímabilinu) og þríjudaginn 10. mars voru nemendatónleikar þar sem nemendur Tónlistarskólans á Egilsstöðum (með einum gesti frá Tónlistarskólanum í Fellabæ) fluttu barrokktónlist. Sunnudaginn 8. mars voru svo nútímatónleikar þar sem flutt voru nýleg verk eftir m.a. Charles Ross og Þórunni Grétu Sigurðardóttur. 

Nemendur Tónlistarskólans á Egilsstöðum stóðu sig með prýði, tónleikarnir á þriðjudagskvöldinu voru þeim til sóma og gaman að sjá nemendur frá 7 ára aldur upp í 20 ára flytja rúmlega 200 ára gamla tónlist af mikilli innlifun. 

Það er Suncana Slamnig sem ber hitann og þungann af hátíðinni en ekki er nú ólíklegt að Charles hennar veiti henni einhverja aðstoð. Við vonum að þetta verði að árlegri hefð, eða allavega annað hvert ár því að þetta er mikil lyftistöng fyrir allt tónlistarstarf hér á Austurlandi. Það er ekki auðvelt að halda úti svona starfi þegar miklu einfaldara væri bara að spila nýjustu popplögin. Það er nauðsynlegt að sem fjölbreyttust tónlist fái að heyrast og hafi aðstandendur hátíðarinnar þökk fyrir.