Sembalhátíð í Vallanesi

Það var mikið um dýrðir í Vallaneskirkju 3. og 5. nóvember síðastliðinn, en þá stóð Suncana Slamnig fyrir Sembalhátíð þar. Nemendur og kennarar Tónlistarskólans á Egilsstöðum lögðu sitt að mörkum til hátíðarinnar með flutningi á ýmiskonar tónlist sem öll átti það sameiginlegt að semball kom við sögu. Fyrri tónleikarnir voru nemendatónleikar þar sem margir nemendur Tónlistarskólans komu fram og spiluðu og sungu fyrir gesti svo mikill sómi var af. Seinni tónleikarnir voru tvískiptir og kom Guðrún Óskarsdóttir, semballeikari, fram á fyrri helmingi þeirra. Seinni helmingur tónleikanna var helgaður ungum tónskáldum af Austurlandi og tóku kennarar Tónlistarskólans virkan þátt í flutningnum.