Skólabyrjun Tónlistarskólans á Egilsstöðum

Nú er kennsla hafin í Tónlistarskólanum á Egilsstöðum. Fyrsta vikan er liðin og kennslan farin að komast í fast form en það tekur oft smá tíma að koma vélinni í gang, þetta er eins og gamall traktor sem þarf að gangsetja varlega og leyfa að hitna aðeins áður en allt er sett á fullt.

Starfið í vetur verður með svipuðu sniði og undanfarið, sömu föstu póstar eru í starfinu, en einnig verður bryddað upp á nýjungum eins og alltaf og munu þær verða kynntar jafnóðum.

Smá breytingar hafa orðið á starfsmannamálum. Hafþór Máni Valsson kemur aftur til starfa eftir fæðingarorlof og Ragnar Jón Grétarsson lætur af störfum. Við þökkum Ragga fyrir vel unnin störf og bjóðum Mána velkominn aftur. Þá mun Öystein Magnús Gjerde hefja störf hjá okkur en hann ætti að vera flestum vel kunnugur enda uppalinn á Fljótsdalshéraði að miklu leyti. Það er mikill fengur fyrir hvert byggðarlag að fá til baka þá einstaklinga sem sótt hafa sér menntun út í heim sama á hvaða sviði það er.

Þegar nýtt skólaár hefst er að mörgu að hyggja og meðal þess sem stundum gleymist en er mjög mikilvægur þáttur er að taka á móti nýjum nemendum. Þá er átt við bæði nemendur sem eru að stíga sín fyrstu skref á skólagöngunni, þ.e. að hefja nám í 1. bekk grunnskóla og eru að byrja í Tónlistarskólanum, en einnig eldri nemendum sem hafa ákveðið að hefja nám í tónlist.

Allir forráðamenn fengu sendan tölvupóst um daginn þar sem farið var yfir ýmis atriði í þessu sambandi og langar mig til að endurtaka hann hér. Hann er svohljóðandi:

"Góðan daginn.

 Þessi póstur er sendur á alla foreldra/forráðamenn nemdna sem skráðir eru í Tónlistarskólann á Egilsstöðum. Efni hans á þó aðallega við nýja nemendur en getur verið gott fyrir aðra að lesa það yfir. Ég mun nota orðið foreldrar og foreldri en það gildir auðvitað það sama um aðra forráðamenn

 Ég hef brýnt það fyrir kennurum skólans að þegar nýjir nemendur koma inn þá skui haft samband við foreldra og bjóða þeim að koma í fyrsta tímann eða fyrstu tímana með nemendanum. Tónlistarkennsla er langmest einkakennsla og það getur verið svolítið stressandi fyrir nemendur að hitta kennarann í fyrsta skipti, þekkja hann kannski ekki einu sinni í sjón.

Kennarinn á að útskýra námið fyrir foreldrunum og skýra hvernig það fer fram og hverju kennarinn ætlar að reyna að ná fram með kennslunni. Einnig skal útskýrt hvernig heimanámi á að vera háttað og foreldrar eru auðvitað alltaf hvattir til að hvetja nemanda til heimanáms.

Þátttaka foreldra í tónlistarnámi barnanna er mjög mikil og í raun mikilvægari en flestir gera sér grein fyrir. Börnum finnst yfirleitt gaman að fá hrós frá foreldrum fyrir það sem vel er gert og ef þau finna það að góður árangur í tónlistarnáminu gerir foreldrana stolta og þau hrósa barninu, þá hvetur það þau til dáða.

Þegar námið er komið af stað er auðvitað ekki nauðsynlegt fyrir foreldra að mæta í hvern tíma en áfram mikilvægt að vera í sambandi við kennarann og fylgjast með náminu."