Söngstund

Fimmtudaginn 28. september fór fram í Egilsstaðakirkju sérstaklega ánægjulegur viðburður á vegum Tónlistarskólans á Egilsstöðum, Egilsstaðaskóla og Leikskólans Tjarnarskógar. Þetta var svokölluð Söngstund, en hún hefur verið haldin árlega undanfarin ár í tengslum við barnamenningarhátíðina BRAS. Á þessum viðburði söng kór sem samanstóð af nemendum 1. bekkjar Egilsstaðaskóla og nemendum úr elsta árgangi leikskólans við undirleik hljómsveitar sem skipuð var nemendum og kennurum tónlistarskólans. Hlín Pétursdóttir Behrens sá um hljómsveitarstjórn og skipulag og Margrét Lára Þórarinsdóttir stjórnaði söngnum með glæsibrag. Nemendurnir stóðu sig frábærlega, og það var einstaklega gaman að fylgjast með þeim, en þetta voru fyrstu tónleikar flestra þeirra!