Söngstund á föstu

Það myndaðist mikil hæglætis- og föstustemmning í Egilsstaðakirkju að kvöldi dags þann 24. mars, en þá sungu nemendur Hlínar Pétursdóttur Behrens úr Tónlistarskólanum á Egilsstöðum og Tónlistarskólanum í Fellabæ ýmis lög tengd föstu og páskum. Var þá bæði um að ræða sönghópa af ýmsum stærðum og einsöngvara. Á efnisskrá voru meðal annars Passíusálmar Hallgríms Péturssonar í raddsetningu Smára Ólasonar auk annarra kirkjulegra verka. Auk þess léku tveir píanónemendur úr Tónlistarskólanum á Egilsstöðum rólega píanótónlist fyrir gesti. Flutningur allra var sérlega vandaður og var þetta afskaplega ljúf stund og gott veganesti inn í nýtt tónleikalaust tímabil sem hófst strax næsta dag.