Söngstund með 1. bekk

Það var líf og fjör í Egilsstaðakirkju á þriðjudaginn 20. október, þegar nemendur Tónlistarskólans á Egilsstöðum og 1. bekkur Egilsstaðaskóla héldu saman söngstund. Sungin voru þrjú lög eftir Atla Heimi Sveinsson, Kvæðið um fuglana, Söngur Dimmalimm og Klementínudans, í útsetningu Sigursveins Magnússonar. Nemendur Tónlistarskólans mynduðu sjö manna hljómsveit og spiluðu undir sönginn. Berglind Halldórsdóttir stjórnaði hljómsveitinni og Margrét Lára Þórarinsdóttir sá um söngstjórn.

Söngstundin hefur verið haldin hátíðleg með fimm og sex ára börnum á Fljótsdalshéraði undanfarin ár í tengslum við BRAS barnamenningarhátíðina, en sökum COVID-faraldursins var ekki unnt að halda hana í sama formi. Því brugðum við á það ráð að halda litla söngstund í kirkjunni, sem var svo tekin upp og sent til foreldra í stafrænu formi, svo þau gætu líka notið söngsins og tónlistarinnar.