Stóra upplestrarkeppnin

Héraðshátíð Stóru upplestrarkeppninnar var haldin í Egilsstaðaskóla þann 8. mars með pompi og prakt, en tíu keppendur frá Fljótsdalshéraði, Seyðisfirði og Vopnafirði lásu. Tónlistarskólinn lét sig ekki vanta og spiluðu nemendur við upphaf hátíðarinnar og á meðan dómnefndin var við störf. Að þessu sinni var boðið upp á flautu- og píanóleik. Þess má til gamans geta að nemendurnir sem lentu í fyrsta og þriðja sæti keppninnar, þær Katrín Edda Jónsdóttir og Hekla Arinbjörnsdóttir, eru nemendur Tónlistarskólans, en Katrín Edda var meira að segja meðal þeirra sem spiluðu fyrir gesti á hátíðinni. Óskum við þeim innilega til hamingju með frábæran árangur!