Stóra upplestrarkeppnin

Héraðshátíð Stóru upplestrarkeppninnar var haldin í fyrirlestrasal Egilsstaðaskóla miðvikudaginn 23. mars. Mátti þar heyra glæsilega nemendur lesa texta og ljóð á afar vandaðan og fágaðan hátt. Nemendur Tónlistarskólans á Egilsstöðum fluttu tónlistaratriði á hátíðinni. Systurnar Joanna Natalia og Maria Anna Szczelina léku Spænskan dans eftir Moritz Moszkowski fjórhent á píanó í upphafi og Ína Berglind Guðmundsdóttir flutti frumsamið lag, Sjáir mig, á meðan dómnefndin var við störf. Óhætt er að segja að nemendunum hafi verið mjög vel tekið. Við þökkum aðstandendum Stóru upplestrarkeppninnar fyrir tækifærið og óskum þeim, svo og nemendunum sem tóku þátt, innilega til hamingju með glæsilega hátíð!