Strengjamót á Egilsstöðum

Helgina 14.-16. október fór fram strengjamót í Tónlistarskólanum. Fiðlu-, víólu-, selló- og kontrabassanemendur komu víða að af landinu ásamt kennurum sínum og foreldrum og æfðu strengjasveitartónlist undir stjórn reyndra hljómsveitarstjóra: Guðmundar Óla Gunnarssonar, Martins Frewer, og Ásdísar Arnardóttur. Þeir léku síðan á vel sóttum hljómsveitartónleikum á sunnudeginum 16. október kl. 13:00 í hátíðarsal Egilsstaðaskóla og stóðu sig með stakri prýði. Nemendur, foreldrar, og kennarar létu vel af mótinu og skemmtu ungu strengjaleikararnir sér vel bæði við æfingar og í frístundum og lærðu mikið. Nemendurnir sem komu annarsstaðar frá gistu í Egilsstaðaskóla og voru til fyrirmyndar hvað varðar hegðun og umgengni.

Tónlistarskólinn þakkar Daníel Arasyni, verkefnisstjóra mótsins, vel unnin störf og Charles Ross fyrir frábært starf við skipulagningu, kennslu, og hljómsveitaraðstoð. Eins þökkum við hljómsveitarstjórunum fyrir að vinna með nemendunum og leiða þá til aukinnar kunnáttu og færni í hljómsveitarspilamennsku. Við þökkum einnig Berglindi Halldórsdóttur, en hún sá um æsispennandi og skemmtilegan tónlistartengdan ratleik fyrir nemendurna á laugardagskvöldi. Þetta mót hefði heldur ekki getað orðið að veruleika án aðstoðar sjálfboðaliða, en foreldrar nemenda frá Egilsstöðum, úr Fellabæ og úr nærsveitum lögðu til ómetanlegt framlag. Við þökkum líka Fljótsdalshéraði, Tónlistarmiðstöð Austurlands, Egilsstaðaskóla, Íþróttamiðstöðinni á Egilsstöðum, Fellabakstri, Héraðsprenti, Valaskjálf, Nettó og MS, sem styrktu mótið.