Tónfundur hjá nemendum Tryggva

Tryggvi Hermannsson, píanó og trommukennari, hélt tónfund með nemendum sínum þann 16. janúar í fyrirlestrarsal Egilsstaðaskóla og er það fyrsti tónfundur ársins 2018. Tónfundir eru eins konar æfingatónleikar, þar sem nemendur æfa sig í að koma fram í óformlegra umhverfi heldur en tónleikar bjóða upp á. Yfirleitt eru tónfundir minni í sniðum en formlegir tónleikar og nemendur fá leiðsögn í framkomu þegar þeir koma fram og eru til dæmis minntir á að hneigja sig eftir að þeir hafa spilað. Tónfundir eru góður undirbúningur fyrir framkomu á tónleikum og stóðu nemendur sig mjög vel.