Tónleikar á Dyngju

Kennarar og nemendur lögðu leið sína á hjúkrunarheimilið Dyngju þriðjudaginn 28. apríl og héldu tónleika fyrir íbúa og gesti. Á tónleikunum mátti heyra leikið á píanó, fiðlu og bassabásúnu. Bassabásúnan var mjög áberandi hluti af tónleikunum, en nemandinn sem spilar á hana, Árni Pétur Árnason, stefnir að því að ljúka framhaldsprófi á hana í vor. Hljóðfærið vakti mikla forvitni hjá íbúum, enda ekki það algengasta! Allir nemendur stóðu sig mjög vel á tónleikunum og þetta var góð stund. Við þökkum íbúum og starfsfólki Dyngju kærlega fyrir móttökurnar og öðrum gestum fyrir komuna og óskum nemendum og kennurum innilega til hamingju!