Tónleikar í Dyngju í febrúar

Nemendur Tónlistarskólans spiluðu og sungu fyrir íbúa, gesti og starfsfólk hjúkrunarheimilisins Dyngju þriðjudaginn 18. febrúar. Á þessum tónleikum var sérstök áhersla á söngatriði, þó að einnig hafi mátt heyra píanó- og þverflautuleik. Mikið var um samsöngsatriði og var það mjög ánægjulegt. Dagskráin var fjölbreytt og skemmtileg, allt frá sígildum perlum og yfir í popp- og rokktónlist og kvikmyndatónlist. Nemendum var vel tekið eins og alltaf og stóðu sig með stakri prýði. Við þökkum íbúum og starfsfólki Dyngju kærlega fyrir góðar móttökur. Nemendur Tónlistarskólans koma næst fram á tónleikum í Dyngju þriðjudaginn 17. mars og verður þá nokkur áhersla á píanótónlist.