Tónleikar í Dyngju í janúar

Nemendur Tónlistarskólans heimsóttu hjúkrunarheimilið Dyngju þriðjudaginn 29. janúar og spiluðu og sungu fyrir íbúa. Á dagskrá var fjölbreytt tónlist, en heyra mátti klassísk tónverk, þjóðlög, sönglög, og blús ásamt spuna. Leikið var á píanó, fiðlu, selló og þverflautu auk þess að íbúar fengu að hlýða á söngdúett, en söngnemendurnir tveir þreyttu þarna frumraun sína á sviði sem söngvarar á vegum Tónlistarskólans. Var nemendum afskaplega vel tekið, eins og alltaf. Við þökkum íbúum og starfsfólki Dyngju innilega fyrir hlýjar móttökur. Næstu tónleikar Tónlistarskólans í Dyngju verða þriðjudaginn 18. febrúar kl. 15:00 og má þá búast við að heyra mikið að söngatriðum.