Tónleikar í Dyngju í mars

Tónlistarskólinn á Egilsstöðum hélt sína mánaðarlegu tónleika í Hjúkrunarheimilinu Dyngju þriðjudaginn 26. mars. Í þetta sinn var boðið upp á leik á píanó, klukkuspil og saxófón. Meðal þeirra sem komu fram var klukkuspilsforskóli skólans, en í honum eru nemendur í 2. bekk. Nemendurnir stóðu sig vel og var að vanda vel tekið af íbúum Dyngju. Efnisskráin var fjölbreytt, en þó með þjóðlagatónlist og sígildri tónlist í aðalhlutverki. Samstarf Tónlistarskólans við Dyngju er mjög gjöfult og það er frábært að nemendur okkar skuli fá svona reglulega tækifæri til þess að koma fram og geti um leið fært íbúum hjúkrunarheimilisins tónlist heim.