Tónlistarstund

Tónleikaröðin Tónlistarstundir á Héraði hefur fyrir löngu fest sig í sessi sem viðburðaröð þar sem tónlistarunnendur á svæðinu auk gesta annarsstaðar frá njóta stuttra og fjölbreyttra tónleika í Egilsstaða- og Vallaneskirkju. Fyrsta tónlistarstundin fór fram í Egilsstaðakirkju sunnudagskvöldið 25. maí. Á þeim tónleikum komu langt komnir tónlistarnemendur þriggja tónlistarskóla í Múlaþingi fram, en það voru nemendur frá Egilsstöðum, Fellabæ og Seyðisfirði. Á tónleikunum mátti heyra söng auk píanó- og fiðluleiks. Það var yndislegt að hlýða á nemendur sýna hvað þau eru búin að vera að fást við í sínu námi og allir nemendurnir stóðu sig frábærlega. Til hamingju frábæru nemendur!