Upphaf kennslu í Tónlistarskólanum

Mánudaginn 30. ágúst hefst kennsla í hljóðfæraleik og söng aftur í Tónlistarskólanum og erum við kennararnir full tilhlökkunar að byrja nýtt skólaár! Kennslan í hóptímum byrjar svo vikuna 6.-10. september. Skóladagatal Tónlistarskólans má sjá með því að smella hér: https://tonegilsstodum.fljotsdalsherad.is/static/files/Skoladagatol/skoladagatal-2021-22-fyrirheimasidur.pdf . 

Allir ættu nú að vera búnir að heyra í kennurum sínum eða barna sinna varðandi einkatíma. Ef það er ekki raunin er best að hafa beint samband við kennara ykkar eða barna ykkar, en netföng allra kennara má finna hér https://tonegilsstodum.fljotsdalsherad.is/is/starfsfolk/ .

Í næstu viku munum við skipuleggja stundaskrá tónfræðinnar og forskólans. Nemendur og foreldrar nemenda í forskóla, tónfræði og ýmsum hóptímum eiga að vera búnir að fá póst þar sem við biðjum um upplýsingar um íþróttir og aðrar tómstundir, svo að við getum reynt að finna sem hentugastan tíma fyrir sem flesta. Það er mikið púsluspil að koma öllum tímunum fyrir, svo ég bið ykkur að svara póstum frá okkur um þetta fljótt og vel.

Ef einhverjir vilja svo gera breytingar á námi sínu eða barna sinna er best að hafa samband við skólastjóra sem fyrst varðandi það, ekki síst vegna þess að til þess að fá öll skólagjöld ársins felld niður þarf að hætta í skólanum fyrir lok fyrstu kennsluviku. Reglur um skólagjöld og gjaldskrá má sjá hér: https://tonegilsstodum.fljotsdalsherad.is/is/forsida/skolagjold .

Í foreldra- og nemendaaðgang að skráningarkerfi skólans, School Archive, má svo sjá upplýsingar um skráningu nemenda, stundaskrá, skólagjöld, námsferil og margt fleira. Það er um að gera að nýta tækifærið í byrjun árs og athuga hvort allar upplýsingar (svo sem heimilisfang, netfang, símanúmer og slíkt) séu réttar í kerfinu. Hér er hlekkur á School Archive: https://innskraning.island.is/?id=schoolarchive.net .

Margir hefja nýtt skólaár fullir af bjartsýni og nemendur eru með glæsta drauma um að geta spilað og sungið skemmtilega tónlist og að gera það vel. Í þessu sambandi vær imjög gott að skoða þessa síðu her, þar sem sjá má ábendingar um hvað þarf til að ná góðum árangri í tónlistarnámi, en æfingin skapar meistarann og það dugar alls ekki bara að mæta í tímana! https://tonegilsstodum.fljotsdalsherad.is/is/nam-i-bodi/godur-arangur-i-tonlistarnami 

Ég bendi ykkur líka á heimasíðuna okkar, https://tonegilsstodum.fljotsdalsherad.is/is/forsida , en þar er að finna mikið magn gagnlegra upplýsinga um skólann og námið.

Að lokum sendum við ykkur öllum óskir um skemmtilegt og lærdómsríkt skólaár. Ekki hika við að hafa samband við kennarana eða Sóleyju skólastjóra ef þið eruð með spurningar eða viljið koma einhverju á framfæri.