Upphaf skólaárs 2020-21

Innilega velkomin í skólann eða aftur í skólann eftir sumarfrí! Vonandi hefur sumarið verið gott hjá ykkur.

Mánudaginn 31. hefst kennsla í hljóðfæraleik og söng aftur í Tónlistarskólanum og erum við kennararnir full tilhlökkunar að byrja nýtt skólaár! Kennslan í hóptímum byrjar svo vikuna 7.-11. september. Skóladagatal Tónlistarskólans má sjá með því að smella hér.

Flestir ættu nú að vera búnir að heyra í kennurum sínum eða barna sinna varðandi einkatíma. Ef það er ekki raunin bið ég ykkur að hafa beint samband við kennara barna ykkar, en netföng allra kennara eru hér. Ef þið hafið engan póst fengið frá skólanum yfirhöfuð, þá bið ég ykkur að hafa samband við mig (soley@egilstadir.is), því þá er líklegt að eitthvað þurfi að skoða netfangaskráninguna hjá ykkur.

Í næstu viku munum við Berglind skipuleggja stundaskrá tónfræðinnar og forskólans. Nemendur í forskóla, tónfræði og ýmsum öðrum hóptímum fá pósta frá okkur þar sem við biðjum um upplýsingar um íþróttir og aðrar tómstundir, svo að við getum reynt að finna sem hentugastan tíma fyrir sem flesta. Það er mikið púsluspil að koma öllum tímunum fyrir, svo ég bið ykkur að svara póstum frá okkur um þetta fljótt og vel.

Ef einhverjir vilja svo gera breytingar á námi sínu eða barna sinna bið ég ykkur um að hafa samband við mig sem fyrst varðandi það, ekki síst vegna þess að til þess að fá öll skólagjöld ársins felld niður þarf að hætta fyrir lok fyrstu kennsluviku. Reglur um skólagjöld og gjaldskrá má sjá hér.

Ég bendi ykkur líka að á heimasíðunni okkar er að finna mikið magn gagnlegra upplýsinga um skólann og námið í honum.

Að lokum vil ég senda ykkur öllum óskir um skemmtilegt og lærdómsríkt skólaár og bið ykkur um að hika ekki við að hafa samband við mig ef þið eruð með spurningar eða viljið koma einhverju á framfæri.

Bestu kveðjur,

Sóley