Útskriftartónleikar Árna Friðrikssonar

Árni ásamt Kristínu R. Sigurðardóttur, söngkennara

Sunnudaginn 14. maí hélt Árni Friðriksson, tenór, útskriftartónleika sína í Egilsstaðakirkju en hann lauk framhaldsprófi í söng frá Tónlistarskólanum á Egilsstöðum í vor með glæsibrag. Ásamt Árna komu fram Þórður Sigurðarson, píanóleikari, Steinrún Ótta Stefánsdóttir, sópran, og Öystein Magnús Gjerde, gítarleikari. Á tónleikunum kenndi ýmissa grasa, en Árni flutti fjölbreytt úrval verka allt frá barokktímabilinu fram á 20. öld. Heyra mátti aríu úr barokkóratóríu, rómantísk sönglög, íslensk sönglög, óperudúett, söngleikjatónlist og fleira, allt flutt af öryggi og listfengi. Það var vel mætt á tónleikana og flutningi Árna afar vel tekið. Við óskum honum innilega til hamingju með þennan mikla áfanga!