Vel heppnaðir Valtónleikar

Valtónleikar fyrir Nótuna 2016 fóru fram miðvikudaginn 2. mars. Á dagskránni voru 14 tónlistatriði sem komu til greina sem fulltrúar Tónlistarskólans á Egilsstöðum á svæðistónleikum fyrir Norður- og Austurland sem haldnir verða í Hofi þann 11. mars nk.

Skemmst er frá því að segja að allir stóðu sig með prýði eins og við áttum reyndar von á og valnefndar beið það erfiða hlutverk að velja fjögur atriði úr þessum hópi.

Valnefndina skipuðu Helga Guðmundsdóttir, Ragnhildur Rós Indriðadóttir og Árni Friðriksson. Þau tóku sér góðan tíma til að ráða ráðum sínum eftir tónleikana en á endanum völdu þau fjögur atriði. Þau höfðu á orði að þetta væri með því erfiðara sem þau hefðu lent í.

Atriðin sem þau völdu voru (í þeirri röð sem þau voru flutt á tónleikunum):

Sigurlaug Björnsdóttir sem söng lagið se tu m'ami eftir Pergolesi.

Hörður Kristinsson sem lék á píanó lagið Strange things happen eftir Watts.

Kristófer Gauti Þórhallsson sem lék á fiðlu lagið Thais Meditation eftir Massenet.

Katrín Edda Jónsdóttir og Joanna Natalia Szczelina sem léku Rigaudon eftir Grieg.

Við óskum þessum nemendum til hamingju og þökkum öllum sem kom fram fyrir þeirra framlag.

Við þökkum einnig Fellabakaríi og Shell skálanum fyrir stuðninginn en Fellabakarí gaf okkur kökur og kleinur til að bjóða upp á eftir tónleikana og Shell skálinn gaf verðlaun, en allir þátttakendur fengu pizzu og gos í Shell skálanum í verðlaun fyrir þátttökuna.