Verðlaunahátíð

Í vetur hafa nemendur Berglindar á miðstigi verið að safna sér stigum. Þau byrjuðu með stóra svarthvíta mynd. Fyrir hverja heimaæfingu settu þau litaðar myndir ofan á þær svarthvítu og smám saman fylltist myndin af litum. Að lokum varð spjaldið fullt og þá var komið að verðlaununum. Það tafðist nú aðeins að halda verðlaunahátíðina, en loksins kom að því að það fannst tími í síðustu viku.

Við hittumst í skólanum seinnipart dags, og það var strax farið í að hlaupa um skólann til að skoða það sem var framundan. Júlía Kristey og Sigurlaug voru komnar til þess að vera krökkunum innan handar. Fyrst á dagskránni var stórleikur, þar sem krökkunum var skipt í tvö lið og var markmiðið að leysa ýmisskonar verkefni um allan skóla. Á hverju verkefni söfnuðu þau stigum fyrir rétt svör eða rétt leyst verkefni. Meðal verkefnanna var að hoppa tónstiga í tröppum, raða saman bútum úr lagi og spila það, þekkja mismunandi hljóðfæri og búa til rytmadæmi með sérútbúnum risateningum.

Næsti dagskrárliður var tónlistarkeppni, úr hugmyndasmiðju Báru Sigurjónsdóttur. Í matsalnum voru tilbúnar sjö stöðvar, með ýmisskonar grafískri nótnaskrift. Hver og einn fékk sinn lit og þurfti að fara í réttri röð á allar stöðvarnar og spila það sem stóð á spjaldinu. Úr þessu varð svo skemmtilegt tónverk.

Eftir öll hlaupin voru krakkarnir orðin svöng og þá var nú gott að enda daginn á að gæða sér á pizzu, áður en var haldið heim á leið.

Þess má geta að heimaæfinga-stigasöfnunin er þegar komin í gang fyrir vorið og forvitnilegt að sjá hvað verður gert þegar vorspjaldið er orðið fullt?!

Það má skoða myndir frá þessari skemmtilegu hátíð á Facebook síðu skólans.