Verkfall kennara í Félagi tónlistarskólakennara

Verkfall kennara í Félagi tónlistarkennara hófst 22. október. Allir kennarar í Tónlistarskólanum á Egilsstöðum eru í félagi tónlistarkennara (FT) þannig að engin kennsla er í skólanum á meðan á verkfalli stendur. Um 1/3 tónlistarkennara á Íslandi eru í Félagi íslenskra hljómlistarmanna (FÍH) og daginn eftir að verkfall hófst samþykkti stjórn FÍH samning við launanefnd sveitarfélaga þannig að FÍH félagar eru ekki í verkfalli. FT getur ekki sætt sig við það sem boðið er upp á í samningnum við FÍH. 

Þegar þetta er skrifað (14.nóvember) er staðan í samningamálum ekki góð og ekki hefur verið boðað til samningafundar. Það sem helst stendur á í samningamálum er að FT vill að laun tónlistarkennara séu sambærileg umsjónarkennara í grunnskóla en það vill samninganefnd sveitarfélaganna ekki fallast á. Einnig vill samninganefnd sveitarfélaganna að sveitarfélögin fái meira vald en nú er til að ákveða lengd skólaárs og heyrst hefur að það gæti jafnvel farið niður í 30 vikur. Það er FT alls ekki tilbúið til að semja um.