Vortónleikar og skólaslit á Hallormsstað

Laugardaginn 6. Júní verða vortónleikar Tónlistarskólans á Egilsstöðum á Hallormsstað og hefjast þeir kl. 14.00 í íþróttahúsinu. Ástæðan fyrir því að þeir eru svona seint er sú að þetta er síðasti veturinn þar sem kennt verður á Hallormsstað og Tónlistarskólinn og Grunnskólinn sameinast um að halda þennan dag hátíðlegan (með söknuði þó). Að tónleikunum loknum verður kaffi og kökur í boði skólanna og skólaslit grunnskólans fara fram og trúlega verða haldin einhver ávörp. M.a. ætlar Jón Guðmundsson sem lengi var kennari og skólastjóri tónlistarskólans á Hallormsstað að vera gestur okkar og segja aðeins frá tónlistarkennslu á Hallormsstað.

En þetta er ekki allt, því að við ætlum að byrja kl. 12.00 með smá tónlistartengdum leik sem Berglind Halldórsdóttir sér um í samstarfi við Sigurlaugu og Júlíu. Allir tónlistarnemendur sem og aðrir nemendur eru boðnir velkomnir að vera með, mæting verður við íþróttahúsið á Hallormsstað kl. 12 og þar verður leikurinn útskýrður.

 Við vonumst til að sjá sem flesta nemendur og foreldra, vonum að veðrið leiki við okkur og kveðjum skólann á Hallormsstað með stæl.